एभरेष्ट बैंकले कमायो पाँच अर्ब ६ करोड नाफा, प्रतिशेयर आम्दानी घट्यो 

काठमाडौं : एभरेस्ट बैंक लिमिटेडले गत आर्थिक वर्षको चौथो त्रैमाससम्मको अपरिष्कृत वित्तीय विवरण प्रकाशित गरेको छ । उक्त वित्तीय विवरण अनुसार बैंकले यस अवधिमा ५ अर्ब ६ करोड ९९ लाख रुपैयाँ खुद नाफा कमाएको छ।

सो नाफा अघिल्लो आर्थिक वर्षको सोही अवधिको तुलनामा ४.७५ प्रतिशतले बढी हो। अघिल्लो आर्थिक वर्षको सोही अवधिसम्ममा बैंकले ४ अर्ब ८३ करोड ९९ लाख रुपैयाँ खुद नाफा कमाएको थियो। 

समिक्षा अवधिमा बैंकको खुद ब्याज आम्दानी र सञ्चालन मुनाफा बढेसँगै खुद नाफा बढेको हो। असार मसान्तसम्म आइपुग्दा अवधिमा बैंकको खुद ब्याज आम्दानी ०.९७ प्रतिशतले बढेर ९ अर्ब १९ करोड चार लाख रुपैयाँ पुगेको छ । 

त्यस्तै, बैंकको खुद फि तथा कमिशन आम्दानी २७.२३ प्रतिशत बढेको छ भने कुल सञ्चालन आम्दानी ६.२१ प्रतिशत बढेको छ। बैंकको सञ्चालन मुनाफा भने ०.४९ प्रतिशतले बढेको छ।

प्रकाशित वित्तीय विवरण अनुसार यस अवधिमा बैंकको कुल वितरणयोग्य मुनाफा ५ अर्ब २५ करोड ७८ लाख १५ हजार रुपैयाँ रहेको छ भने वितरणयोग्य प्रतिशेयर आम्दानी ३८.३२ रुपैयाँ रहेको छ।

यस अवधिमा आइपुग्दा बैंकको खराब कर्जा भने बढेको छ । गत वर्षको असारसम्ममा ०.३८ प्रतिशत रहेको बैंकको खराब कर्जा बढेर ०.४९ प्रतिशत पुगेको छ। गत वर्ष १५ करोड ५३ लाख रुपैयाँ रिभर्स रहेको बैंकको इम्पेरिमेन्ट चार्ज बढेर २७ करोड २८ लाख रुपैयाँ पुगेको छ ।  

गत वर्षको चौथो त्रैमाससम्म आइपुग्दा नाफाबढेपनि बैंकको प्रतिशेयर आम्दानी घटेको छ। यस अवधिमा बैंकको इपीएस ०.४४ रुपैयाँ घटेर ३६.९५ रुपैयाँ पुगेको छ। त्यस्तै बैंकको प्रतिशेयर नेटवर्थ २५६.४७ रुपैयाँ रहेको छ भने मूल्य आम्दानी अनुपात १८.८१गुणा रहेको छ।

असार मसान्तसम्म १३ अर्ब ७२ करोड १३ लाख रुपैयाँ चुक्ता पुँजी रहेको बैंकको जगेडा कोषमा १५ अर्ब ७२ करोड ७८ लाख रुपैयाँ रहेको छ भने रिटेन्ड अर्निङमा ५ अर्ब ५० करोड ४२ लाख रुपैयाँ रहेको छ ।