क्यासिनो र पूर्वाधार थपिँदा बुटवलको ‘सफ्रोन सीके होटल’को लागत तीन अर्ब १४ करोड नाघ्यो

काठमाडौं : निजी लगानीमा बुटवलमा निर्माण भइरहेको पाँचतारे सफ्रोन सीके होटलको निर्माण लागत बढेको छ । सुरुमा ३ अर्ब ९ करोड रुपैयाँमा सम्पन्न गर्ने अनुमान गरिएको होटल परियोजनाको लागत बढेर ३ अर्ब १४ करोड ५० लाख रुपैयाँ पुगेको हो ।

होटल निर्माण लागत वृद्धि हुनुमा क्यासिनो सञ्चालनका लागि छुट्टै भवन निर्माण, थप जग्गा व्यवस्थापन, होटल परिसरको ल्यान्डस्केपिङ, सडक सुविधा, उचित ढल निकासलगायतका पूर्वाधार निर्माण मुख्य कारण रहेको कम्पनीले जनाएको छ ।

सुरुवाती योजनाअनुसार परियोजनाको लागत करिब ३ अर्ब ९ करोड रुपैयाँ अनुमान गरिएको थियो । उक्त लागतलाई ऋण र इक्विटीको मिश्रणबाट व्यवस्थापन गर्ने योजना बनाइएको थियो । तर परियोजनाको दायरा विस्तार भएपछि कुल लागत बढेर ३ अर्ब १४ करोड ५० लाख रुपैयाँ पुगेको हो ।

होटल सफ्रोन सीके प्रालिले निर्माण गरिरहेको यो पाँचतारे होटलमा १०९ वटा कोठा रहनेछन् । होटलमा रेस्टुरेन्ट, स्वीमिङ पुल, सम्मेलन तथा बैंक्वेट हल, स्पा, क्यासिनो लगायतका सुविधा समावेश गरिएको छ । परियोजनाको कुल लागतमध्ये ७० प्रतिशत अर्थात् २ अर्ब १९ करोड रुपैयाँ बैंक कर्जाबाट र बाँकी ३० प्रतिशत रकम प्रवर्द्धकको इक्विटी लगानीबाट व्यवस्थापन गरिएको छ ।

कम्पनीले होटल सञ्चालनका लागि विश्वप्रसिद्ध होटल ब्रान्ड हायातसँग व्यवस्थापन सम्झौता गरेको छ । हायातको अन्तर्राष्ट्रिय अनुभव, ब्रान्ड पहिचान, बजार प्रवर्द्धन, ग्राहक बुकिङ प्रणाली तथा सञ्चालन मापदण्डमार्फत होटलको व्यावसायिक सञ्चालनमा सहयोग पुग्ने अपेक्षा गरिएको छ ।

होटल भैरहवा अन्तर्राष्ट्रिय विमानस्थलबाट करिब २४ किलोमिटर तथा नेपाल–भारत सीमा क्षेत्र सोनौलीबाट करिब २६ किलोमिटर दूरीमा अवस्थित छ । विश्व सम्पदा सूचीमा रहेको लुम्बिनी करिब ३८ किलोमिटर दूरीमा रहेकाले धार्मिक तथा पर्यटकीय गतिविधिबाट होटलले व्यवसायिक अवसर पाउने अपेक्षा गरिएको छ ।

त्यस्तै, प्रस्तावित बुटवल मण्डप अन्तर्राष्ट्रिय सम्मेलन तथा प्रदर्शनी केन्द्र नजिक रहेकाले सम्मेलन, प्रदर्शनी तथा व्यावसायिक कार्यक्रममार्फत होटलको व्यवसाय विस्तार हुने लक्ष्य कम्पनीले राखेको छ ।

होटल सफ्रोन सीके प्रालि सन् २०१८ नोभेम्बर २१ मा स्थापना भएको कम्पनी हो । कम्पनीले बुटवलमा करिब ५ हजार ७४६ वर्गमिटर क्षेत्रफलमा पाँचतारे होटल निर्माण गरिरहेको छ । सफ्रोन सीके प्रालिका अध्यक्ष चुन्नाप्रसाद शर्मा हुन् । शर्मा यसअघि यशोदा फुड्स प्रालिका अध्यक्षसमेत रहिसकेका अनुभवी व्यवसायी हुन् ।  

कम्पनीको कर्जा दायित्व पनि बढेको छ । कम्पनीले दीर्घकालीन तथा अल्पकालीन गरी कुल २ अर्ब २४ करोड रुपैयाँ बराबरको कर्जाको रेटिङ गराएको छ । यसअघि कम्पनीको कर्जा सीमा १ अर्ब ९० करोड रुपैयाँ रहेको थियो । कम्पनीले दीर्घकालीन कर्जाका लागि २ अर्ब १९ करोड रुपैयाँ र अल्पकालीन कर्जाका लागि ५ करोड रुपैयाँको रेटिङ गराएको हो ।