नेपाल पारवहन तथा गोदाम व्यवस्था कम्पनी ५४औं वर्षमा, यस्ता छन् आगामी नीति तथा कार्यक्रम

काठमाडौं : नेपाल सरकारको पूर्ण स्वामित्व रहेको नेपाल पारवहन तथा गोदाम व्यवस्था कम्पनी लिमिटेड स्थापनाको ५४औं वर्षमा प्रवेश गरेको छ ।

नेपालबाट समुद्रपारका मुलुकहरुमा निकासी हुने तथा ती मुलुकहरुबाट पैठारी हुने सामानहरुको निमित्त पारवहन सम्बन्धी सेवा सुविधाहरु प्रदान गर्ने उद्देश्यले २०२८ भाद्र ३० गते कम्पनीको स्थापना भएको थियो ।

भारतको कम्पनी ऐन, १९५६ अन्तर्गत विदेशी कम्पनीको रुपमा भारतमा समेत दर्ता भइ निरन्तर सेवा प्रवाह गर्दै आएको यस कम्पनीको केन्द्रीय कार्यालय, शाखा र उपशाखा गरी ८ वटा कार्यालयमार्फत सेवा प्रवाह गरिरहेको छ ।

आयात/निर्यात व्यापारमा सुविधा उपलव्ध गराई नेपालको अर्थ व्यवस्थाको विकासमा टेवा दिने, आयात÷निर्यात व्यापारमा पारवहन सम्वन्धि सुविधाहरुमा वृद्धि र खर्चमा स्थिरता ल्याउने किसिमसंग आफ्नो कारोवार संचालन गर्ने, सरकारी र गैर सरकारी जुनसुकै ग्राहकहरुलाई आवश्यक सुविधा तथा सेवा उपलव्ध गराउने उद्देश्यले यस कम्पनीको स्थापना गरिएको थियो ।

त्यस्तै आधिकारीक निकायको स्विकृति र सहमतिले प्रचलित कानूनको अधिनमा रही आयात/निर्यात व्यापारको लागि सुविधाजनक गोदाम घर (CFS/ICD/ICP) पूर्ण रुपमा वा आंशिक रुपमा संचालन गर्ने र नेपालको सामान राख्ने गोदाम घर वा क्षेत्रबाट नेपालको लागि हुने वा नेपालबाट निर्यात हुने मालसामानको पारवहनमा सुविधा एवं सेवा उपलव्ध गराउने गरी कम्पनीको स्थापना भएको थियो । 

स्थापनाको ५४औं वर्षमा आईपुग्दा कम्पनीको संचालन, व्यवस्थापन र कार्य सम्पादनलाई सहज र प्रभावकारी बनाउने यात्रामा निरन्तर सहयोग, समन्वय र सहकार्य गर्ने निकायहरुप्रति अध्यक्ष छपिराज पन्तले हार्दिक आभार व्यक्त गरेका छन् । आगामी दिनमा कम्पनीले नेपालको आयात निर्यात व्यापार, गोदाम संचालन एवं पारवहन सहजीकरणको क्षेत्रमा अझै विशिष्ट र परिष्कृत भूमिका खेल्ने प्रतिवद्धता जनाएका छन् । कम्पनीलाई थप गतिशील र विस्तारित बनाउन सम्पूर्ण सरोकारवालाहरुको रचनात्मक सहयोग र सहकार्यको अपेक्षा अध्यक्ष पन्तले गरेका छन् ।

काठमाडौंको बालुवाटारमा प्रधान कार्यालय रहेको कम्पनीको कोलकाता, काँकडभिट्टा, बीरगञ्ज शाखा, गौतमबुद्ध अन्तर्राष्ट्रिय विमानस्थल र त्रिभुवन अन्तराष्ट्रिय विमानस्थलमा शाखा कार्यालय रहेको छ । त्यस्तै हल्दिया र राधीकापुरमा उपशाखा रहेको छ ।

कम्पनीले यी कार्यालयमार्फत कम्पनीले क्लियरिङ्ग (भन्सार दस्तावेजीकरश, शुल्क र कर गणना र भन्सार क्लियरेन्स), फारवार्डिङ्ग (यातायातको समन्वय, यातायातको दस्तावेजीकरण, कार्गो ह्यान्डलिङ र गोदाम) र अन्डरटेकिङ्ग सेवा प्रदान गर्दै आएको कम्पनीका महाप्रबन्धक प्रकाश प्रसाद पोखरेलले जानकारी दिए ।

आर्थिक वर्ष २०७९/८० मा कम्पनीले ३० करोड २२ लाख आम्दानी गरी २६ करोड ११ लाख खर्च गरेको छ । कम्पनीले यस आ.वमा ४ करोड ११ लाख खुद नाफा आर्जन गरेको छ । कम्पनीसँग ५४ करोड ३८ लाख रुपैयाँ सञ्चित नाफा रहेको महाप्रबन्धक पोखरेलले जानकारी दिए ।

कम्पनीमा अर्थ मन्त्रालय, उद्योग, वाणिज्य तथा आपूर्ति मन्त्रालय र महालेखा नियन्त्रक कार्यालयको प्रति कित्ता एक हजारको दरले १२ हजार २ सय ४३ थान सेयर रहेको छ ।

कम्पनीले चालू आर्थिक वर्ष २०८१/८२ मा थप सेवाक्षेत्र विस्तार गर्ने वार्षिक नीति तथा कार्यक्रमहरु निमार्ण गरेको छ । कम्पनीले भारतको कोलकाता/हल्दिया र बीरगंज/रक्सौलमा दीर्घकालीन लिजमा लिएका जमिनको व्यवसायिक प्रयोग गर्न आवश्यक पूर्वाधार निर्माणमा जोड दिँदै सञ्चालन तथा व्यवस्थापन साझेदारी सम्बन्धी कार्यविधिगत प्रबन्ध गरिने जनाएको छ ।

कम्पनीले परम्परागत रुपमा सञ्चालन गरिरहेका व्यापार सहजीकरणसँग सम्बन्धित लजिस्टिक सेवाहरुको प्रकृतिमा आएको परिवर्तनलाई आत्मसात गर्दै नयाँ व्यवसायिक अवसरहरुको खोजिका लागि आवश्यक अध्ययन र परामर्श गरिने नीति तथा कार्यक्रममा उल्लेख छ । त्यसैगरी पारवहन लजिस्टिकमा कम्पनीको भूमिका बढाउन सम्बद्ध पक्षहरुसँग औपचारिक साझेदारीका सम्भावनाहरु खोजी गर्दै बजारीकरण रMarket Intelligence मा जोड दिईने जनाएको छ ।

पारवहन ढुवानी र लजिस्टिक व्यवस्थापनका क्षेत्रमा निरन्तर भैरहेका प्राविधिक विकास, प्रकियागत परिवर्तन र द्विपक्षीय तथा क्षेत्रीय सम्झौताले कम्पनीको कार्यक्षेत्रको दायरामा पार्न सक्ने जोखिमको पूर्व आकलन गरी तदनुसार कम्पनीका नीति तथा कार्यक्रम अनुकूलन गर्ने अभ्यासको शुरुवात गरिने कम्पनीका अध्यक्ष पन्तले बताए ।