भीमदत्त नगरपालिकाका पूर्वमेयरसहित १० जना विरुद्ध भ्रष्टाचार मुद्दा, एक करोड ३४ लाख विगो माग 

काठमाडौं : अख्तियार दुरुपयाृेग अनुसन्धान आयोगले भ्रष्टाचारको आरोपमा दश जनाविरुद्ध मुद्दा दायर गरेको छ । आयोगले भीमदत्त नगरपालिका, कन्चनपुरका तत्कालीन नगरप्रमुख सुरेन्द्र बहादुर बिष्ट र तत्कालीन नि.प्रमुख प्रशासकीय अधिकृत हरिदत्त जोशीसहित १० जना एवं भवानी कन्स्ट्रक्शन प्रालि विरुद्ध राजस्व चुहावट गरी भ्रष्टाचार गरेको आरोपमा मुद्दा दायर गरेको हो ।

आयोगका अनुसार नगरपालिका आव २०७६/०७७ मा प्रकृतिक स्रोतबाट (नदीजन्य) प्राप्त हुने आयको ठेक्कामा बोलपत्रको सम्झौता अनुसार प्राप्त गर्नुपर्ने आयमा नियम विपरीत छुट दिएको भन्ने उजुरी परेको थियो । 

सोही उजुरीका आधारमा अनुसन्धान गर्दा नगरपालिकाका तत्कालीन नगरप्रमुख सुरेन्द्र बहादुर बिष्ट र तत्कालीन नि.प्रमुख प्रशासकीय अधिकृत हरिदत्त जोशीले आव २०७६/०७७ मा महाकाली नदीजन्य पदार्थको (ढुङ्गा, गिट्टी, बालुवा, ग्राभेल र माटो) रोयल्टी शुल्क उठाउने ठेक्का नं. १७/रोयल्टी/०७६/७७ ठेक्कामा सम्झौता पछि नगरकार्यपालिकाको कार्यालयलाई बुझाउनपर्ने ठेक्का रकममा कुनै किसिमको छुट वा मिनाहाको लागि दावी गर्न पाईने छैन र ठेक्का कवोल गरेको पाइएको आयोगको ठहर छ ।

उक्त सम्झौता भएबमोजिमको रकममा कुनै कारण देखाई वा नदेखाई कुनै किसिमको मिनाह दिईने छैन भन्ने अवस्था विद्यमान हुँदाहुँदै नगरप्रमुख सुरेन्द्र बहादुर विष्टको अध्यक्षतामा नगरसभाको निर्णयले राजस्वमा छुट दिने मनसायले ५ सदस्यीय कार्यदल गठन गरी सोही कार्यदलको सिफारिसको आधारमा मुल्यअभिवृद्धि करसमेत एक करोड ३४ लाख ९७ हजार ४५३ रुपैयाँ ८७ पैसा बराबरको रकम छुट दिने निर्णय अनुमोदन गरेको आयोगले जनाएको छ ।

ठेक्का सम्झौता अनुसार राजस्व नउठाई सरकार र प्रदेश सरकारको स्वीकृति बिना उक्त रकम  भीमदत्त नगरपालिका र सरकारले पाउने राजस्वमा चुहावट गरी भ्रष्टाचार गरेको पुष्टि भएको आयोगको भनाई छ । नगरप्रमुख विष्ट र प्रशासकीय अधिकृत जोशीलाई सोही रम बराबरको विगो कायम गरी दोव्वर जरिवाना समेत गरी सजायको मागदावी गर्दै आयोगले मंगलबार विशेष अदालत काठमाडौंमा मुद्दा  दयर गरेको हो ।