सीएमसीको कारोबार साढे दुई अर्ब नाघ्यो, स्वास्थ्य बीमा र क्यान्सर सेवाले आयमा उल्लेख्य वृद्धि

काठमाडौं : चितवन मेडिकल कलेज प्राइभेट लिमिटेडले एकै आर्थिक वर्षमा साढे दुई अर्ब रुपैयाँभन्दा बढीको कारोबार गरेको छ । कम्पनीले गत आर्थिक वर्ष (सन् २०२५) मा दुई अर्ब ५१ करोड ४० लाख रुपैयाँको कारोबार गरेको छ । जुन अघिल्लो वर्षको तुलनामा करिब २७ प्रतिशतले बढी हो ।

Sponsored Advertisement

कम्पनीका अनुसार अघिल्लो वर्ष सन् २०२४ मा एक अर्ब ९७ करोड ४० लाख रुपैयाँको कारोबार भएको थियो भने सन् २०२३ मा एक अर्ब ६९ करोड ७० लाख रुपैयाँको व्यापार भएको छ । 

त्यस्तै सन् २०२२ मा कम्पनीले २ अर्ब ७ करोड ९० लाख रुपैयाँको व्यापार गरेको थियो । पछिल्ला वर्षहरूमा कारोबारमा देखिएको उतारचढावबीच २०२५ मा उल्लेखनीय सुधार देखिएको छ । चालु आर्थिक वर्षको पहिलो चार महिनामै कम्पनीले ८६ करोड ४० लाख रुपैयाँको कारोबार गरिसकेको कम्पनीले जनाएको छ । 

कम्पनीले कारोबार वृद्धि हुनुको प्रमुख कारण बिरामी भर्नाको संख्या बढ्नु रहेको जनाएको छ । विशेषगरी सन् २०२४ को जुलाईदेखि सरकारी स्वास्थ्य बिमा कार्यक्रम लागू भएपछि अस्पतालमा सेवाग्राहीको चाप बढेको कम्पनीको भनाइ छ ।

चितवन मेडिकल कलेजले सन् २०२३ देखि क्यान्सरसम्बन्धी विशेष उपचार सेवाको व्यवसायिक कारोबार सुरु गरेको थियो । क्यान्सर उपचारका लागि कम्पनीले एक अर्ब १२ करोड १० लाख रुपैयाँको लगानीमा अत्याधुनिक अस्पताल निर्माण गरेको हो । यस परियोजनामा कम्पनीको लगानी अनुपात ७०ः३० रहेको छ ।

यससँगै अस्पतालभित्रै फार्मेसी सेवा सञ्चालनमा ल्याइएकाले पनि आम्दानी बढ्न सहयोग पुगेको कम्पनीले जनाएको छ । क्यान्सर उपचार सेवा र फार्मेसी सञ्चालनपछि अस्पतालको समग्र सेवाग्राही संख्या तथा औसत आम्दानी दुवैमा वृद्धि भएको देखिएको हो । 

प्रकाशित वित्तीय विवरणअनुसार कम्पनीको सञ्चालन नाफा सन् २०२४ मा ३०.०४ प्रतिशत रहेको थियो भने २०२५ मा २९.३० प्रतिशत कायम भएको छ । यद्यपि नाफा प्रतिशतमा सामान्य गिरावट देखिए पनि कुल कारोबार वृद्धिका कारण नाफाको परिमाण सन्तोषजनक रहेको छ ।

सन् २०२२ मा कम्पनीको पीबीआईएलटीडी मार्जिन (ब्याज भाडा, मूल्य ह्रास र करअघिको नाफा) ३३.२९ प्रतिशत रहेको थियो भने २०२३ मा घटेर २५.२६ प्रतिशतमा सीमित भएको थियो । पछिल्ला दुई वर्षमा भने मार्जिन स्थिर हुँदै गएको देखिन्छ ।

कम्पनीले दीर्घकालीन तथा अल्पकालीन कर्जाका लागि कुल ३ अर्ब ३ करोड २३ लाख रुपैयाँको रेटिङ गराएको छ । यसअन्तर्गत दीर्घकालीन कर्जाका लागि २ अर्ब ४२ करोड ७३ लाख रुपैयाँ र अल्पकालीन कर्जाका लागि ६० करोड ५० लाख रुपैयाँ रहेको छ ।

वित्तीय तथ्यांकअनुसार कम्पनीको ओभरअल गियरिङ सन् २०२२ मा १.४८ गुणा रहेकोमा २०२५ मा बढेर १.९७ गुणा पुगेको छ । यस्तै, ब्याज तिर्ने क्षमता सन् २०२५ मा ४.३७ गुणा पुगेको छ, जुन सन् २०२३ को २.५४ गुणाको तुलनामा सुधारिएको अवस्था हो । यसले कम्पनीको कर्जा व्यवस्थापन क्षमता सन्तोषजनक रहेको देखिएको छ । 

हाल कम्पनीले कुल ७५० शय्या क्षमतामध्ये ५३७ शय्याबाट सेवा प्रदान गरिरहेको छ । चितवन मेडिकल कलेजले डेन्टिस्ट्री, फरेन्सिक मेडिसिन, अप्थाल्मोलोजी, ओरल एन्ड म्याक्सिलोफेसियल सर्जरी, प्याथोलोजी, अर्थोडोन्टिक्स, पेडोडोन्टिक्स, रेडियो डाइग्नोसिस, सर्जरी अन्कोलोजीसहित विभिन्न विशिष्टीकृत स्वास्थ्य सेवा दिँदै आएको छ ।

स्वास्थ्य सेवासँगै कम्पनीले मेडिकल शिक्षामा पनि उल्लेखनीय योगदान दिँदै आएको छ । हाल कलेजले १४ वटा विभिन्न मेडिकल तथा स्वास्थ्यसम्बन्धी कोर्सहरू सञ्चालन गरिरहेको छ ।

कम्पनीका अनुसार गत आर्थिक वर्षमा कुल आम्दानीमध्ये ६१ प्रतिशत अस्पताल सेवाबाट आएको छ भने ३१ प्रतिशत आम्दानी मेडिकल कलेजबाट प्राप्त भएको छ । बाँकी आम्दानी अन्य सहायक सेवाबाट आएको रेटिङ प्रतिवेदनमा उल्लेख छ ।

सन् २०२४ मा पब्लिक लिमिटेड कम्पनीमा रूपान्तरण भएको चितवन मेडिकल कलेज हाल अध्यक्ष हरिशचन्द्र न्यौपानेको नेतृत्वमा सञ्चालन भइरहेको छ । स्वास्थ्य सेवा र मेडिकल शिक्षाको संयोजन, क्यान्सरजस्ता विशिष्टीकृत सेवामा गरिएको ठूलो लगानी तथा स्वास्थ्य बिमाको विस्तारले आगामी दिनमा पनि कम्पनीको कारोबार र सेवाको दायरा थप विस्तार हुने अपेक्षा गरिएको छ ।