‘श्रवण कुमार अग्रवाल नाफिज फेलोसिप’ का लागि सम्झौता, सात लाखको अक्षय कोष स्थापना गरिने 

काठमाडौं : ‘श्रवण कुमार अग्रवाल नाफिज फेलोसिप’ का लागि नेपाल आर्थिक पत्रकार संघ (नाफिज) र नेपाल उद्योग परिसंघ ९सिएनआई० का अध्यक्ष तथा आरएमसी ग्रुपका कार्यकारी अध्यक्ष राजेशकुमार अग्रवाल बीच समझदारी पत्रमा हस्ताक्षर भएको छ ।

‘श्रवण कुमार अग्रवाल नाफिज फेलोसिप’ का लागि सात लाख रुपैयाँको अक्षयकोष स्थापना गर्ने गरि मङ्गलवार नाफिज र अग्रवालबीच समझदारी भएको हो । समझदारी पत्रमा नाफिजकी अध्यक्ष मेनुका कार्की र परिसंघका अध्यक्ष अग्रवालले हस्ताक्षर गरेका छन् । 

गत २९ मंसिरमा सम्पन्न नाफिजको १५ औँ वार्षिक साधारण सभामा अध्यक्ष अग्रवालले आफ्नो स्वर्गीय पिता श्रवणकुमार अग्रवालको स्मृतिमा अक्षयकोष स्थापना गर्ने घोषणा गरेका थिए । 

गत साउनमा निधन भएका श्रवण कुमार अग्रवाल आरएमसी ग्रुपका संस्थापक हुन् । मारवाडी सेवा समितिका पूर्व अध्यक्ष समेत रहेको श्रवण कुमार अग्रवाल संविधान सभा सदस्य समेत हुन् । उनको स्मृतिमा छोरा राजेश कुमार अग्रवालले अक्षयकोष स्थापना गर्ने घोषणा गरेपछि थप आवश्यक प्रक्रिया पुरा गरेर मङ्गलवार समझदारी पत्रमा हस्ताक्षर गरिएको हो । फेलोसिप दिने गरि नाफिजमा स्थापना हुन लागेको यो नै पहिलो अक्षयकोष हो । 

समझदारीअनुसार अध्यक्ष अग्रवालले व्यक्तिगत रूपमा अक्षयकोषमा सात लाख रुपैयाँ जम्मा गर्नेछन् । नाफिजले त्यस अक्षय कोषबाट वार्षिक रूपमा एक जना आर्थिक पत्रकारलाई ५० हजार रुपैयाँ बराबरको फेलोसिप प्रदान गरिनेछ । 

खोजमूलक आर्थिक समाचार लेखनका लागि फेलोसिप प्रदान गरिने सम्झौता पत्रमा उल्लेख छ । फेलोसिप प्राप्त गर्ने पत्रकारलाई नाफिजले मेन्टर पनि उपलब्ध गराउनेछ । 

‘श्रवण कुमार अग्रवाल नाफिज फेलोसिप’ प्रदान गर्न तीन जनाको छनोट समिति गठन गरिनेछ । सोही समितिले फेलोसिप प्रदानका लागि थप काम कारबाही अघि बढाउने छ । अब आवश्यक प्रक्रिया पुरा गरेर आगामी आर्थिक वर्ष २०८२/८३ देखि यसलाई कार्यान्वयनमा लैजाने नाफिजकी अध्यक्ष मेनुका कार्कीले बताइन् । 

नेपाल उद्योग परिसंघका अध्यक्ष राजेशकुमार अग्रवालले यो कदमले आर्थिक पत्रकारहरूलाई थप प्रोत्साहन मिल्ने बताए ।