निप्पोन फर्मास्युटिकलले आईपीओ निष्कासन गर्ने, बिक्री प्रबन्धकमा नबिल इन्भेष्टमेण्ट बैंकिङ्ग

काठमाडौं : बिराटनगर म.न.पा वडा नं. १२ बखरीमा अवस्थित निप्पोन फर्मास्युटिकल लिमिटेडले सर्वसाधारणमा प्राथमिक शेयरको सार्वजनिक निष्काशन गर्ने भएको छ । 

विद्यमान धितोपत्र दर्ता तथा निष्काशन सम्बन्धी नियमावली र धितोपत्र निष्काशन तथा बाँडफाँड सम्बन्धि निर्देशिकाहरुमा भएको व्यवस्था बमोजिम निकट भविष्यमा  नियमनकारी निकायहरुबाट आवश्यक स्वीकृति प्राप्त गरी सर्वसाधारणमा  आईपीओ जारी गर्न लागेको हो । 

कम्पनीले उक्त शेयर निष्काशन कार्यका लागि शेयर निष्काशन तथा बिक्री प्रबन्धकको रुपमा नबिल इन्भेष्टमेण्ट बैंकिङ्ग लिमिटेडलाई नियुक्त गरेको छ । 

श्री निप्पोन फर्मास्युटिकल लिमिटेड एक डब्लुएचओ–जीएमपी र अन्तर्राष्ट्रिय गुणस्तर मापदण्डहरु अनुरुप विभिन्न प्रकारका औषधीहरु जस्तै ट्यावलेट, क्याप्सुल, तरल औषधी, मलम, क्रीम जेल, ओआरएस, ड्राइ सिरप र पेनिसिलिन लगायतका उत्पादन गर्ने प्रमाणित फर्मास्युटिकल कम्पनी हो । जसको विधिवध दर्ता २००६ मा भई उद्योग स्थापना २०१७ मा भएको थियो ।

कम्पनीले उच्च गुणस्तरको औषधी तथा अषौधिजन्य उत्पादनहरुको विबिध उत्पादन पोर्टफोलियोको विकास र निर्माण गरेर नेपाली फर्माबजारलाई सम्बोधन गरिरहेको छ । स्थापना भएको ५ वर्ष पछि अर्थात् २०२२ देखि आफ्नो व्यावसायिक उत्पादन र मार्केटिङ्ग सुरु गरेको निप्पोन फर्मास्युटिकलले स्थापनाको ४ वर्षमा विभिन्न थेराप्युटिक सेगमेन्टका ६० भन्दा बढी उत्पादनहरुको बजारीकरण गर्न सक्षम भएको छ ।

निप्पोन फर्मास्युटिकल लिमिटेड “सवैका लागि सु-स्वास्थ्य” भन्ने मूल नाराबाट निर्देशित यस कम्पनी देश र जनताका लागि आवश्यक पर्ने अधिकांश औषधीहरुमा आत्मनिर्भर बन्न सहयोग गरेर राष्ट्रिय स्वास्थ्य सेवा प्रणालीलाई ठूलो मद्दत गरेको छ ।

निष्काशन कम्पनीसँग भएको सो सम्झौता पत्रमा निप्पोन फर्मास्युटिकल लिमिटेडको तर्फबाट कम्पनीका प्रबन्ध निर्देशक मन्टु घिमिरे तथा नबिल इन्भेष्टमेन्ट बैंकिङ्ग लिमिटेडका तर्फबाट प्रमुख कार्यकारी अधिकृत मनिष नारायण जोशीले हस्ताक्षर गरेको कम्पनीले जनाएको छ ।