नेपालमा लगानी गर्न भारतीय उद्योगी-व्यवसायीलाई अर्थमन्त्री डा. वाग्लेको आह्वान

नयाँ दिल्ली : अर्थमन्त्री डा. स्वर्णिम वाग्लेले भारतीय लगानीकर्ता, उद्योगी तथा व्यवसायिक नेताहरूलाई नेपालमा लगानी र व्यापारका अवसरहरूको खोजी र विस्तार गर्न आह्वान गरेका छन्। 

उनले नेपालमा लगानीका लागि यो उपयुक्त समय भएको समेत बताए ।

नयाँ दिल्लीस्थित इन्डिया ह्याबिट्याट सेन्टरमा कन्फेडेरेसन अफ इन्डियन इन्डस्ट्री (CII) द्वारा आयोजित व्यापार तथा लगानी अन्तरक्रिया कार्यक्रमलाई सम्बोधन गर्दै डा. वाग्लेले उक्त कुरा बताएका हुन् ।

कार्यक्रममा भारतीय व्यवसायिक नेताहरू र निजी क्षेत्रका प्रतिनिधिहरूको उपस्थिति रहेको थियो। यो कार्यक्रम मन्त्री वाग्लेको तीन दिने नयाँ दिल्लीको औपचारिक भ्रमणको एक महत्वपूर्ण भाग थियो।

समारोहलाई सम्बोधन गर्दै अर्थमन्त्री वाग्लेले नेपालमा उदीयमान लगानीका अवसरहरूमाथि प्रकाश पार्दै देशको आर्थिक रूपान्तरणमा सहभागी हुन भारतीय व्यवसायीहरूलाई आमन्त्रण गरे। उनले नेपालले उच्च वृद्धिको सम्भावना भएका क्षेत्रहरूमा लगानीका लागि ठूलो अवसर प्रदान गर्ने उल्लेख गर्दै पहिले नै नेपालमा सञ्चालित भारतीय कम्पनीहरूलाई आफ्नो लगानी विस्तार गर्न र नयाँ लगानीकर्ताहरूलाई नेपाली बजारको खोजी गर्न आग्रह गरे।

मन्त्री वाग्लेले नेपाल सरकार सुशासन, आर्थिक समृद्धि, लगानी सहजीकरण र संरचनात्मक आर्थिक रूपान्तरणको एजेन्डामा अघि बढिरहेको कुरामा जोड दिए। उनले नीतिगत सुधारलाई तीव्र बनाउन र अझ बढी अनुमानयोग्य, पारदर्शी तथा लगानीकर्ता-मैत्री व्यवसायिक वातावरण सिर्जना गर्न सरकारले गरिरहेका प्रयासहरूको चर्चा गरे।

"डिजिटलाइजेसन, स्वच्छ ऊर्जा, उच्च मूल्यको कृषि, वेलनेस पर्यटन र उत्पादन साझेदारीको अवधारणामा आधारित उत्पादन क्षेत्र नेपालको अर्थतन्त्रका महत्वपूर्ण वाहकका रूपमा उदय भइरहेका छन्," मन्त्री वाग्ले भने, "भारतीय व्यवसायीहरूलाई नेपाललाई बजारको रूपमा मात्र नभई लगानी, उत्पादन, मूल्य अभिवृद्धि र क्षेत्रीय तथा विश्वव्यापी आपूर्ति श्रृंखलामा एकीकरणका लागि रणनीतिक साझेदारको रूपमा हेर्न चाहन्छौं ।" 

अर्थमन्त्री वाग्लेले वार्षिक बजेट, कर सुधार र लगानीकर्ता-मैत्री नीतिगत पहलहरूमार्फत नेपाल सरकारले हालै चालेका कदमहरू व्यवसायिक वातावरण सुधार गर्न, लगानीका बाधाहरू हटाउन र निजी क्षेत्रको नेतृत्वमा आर्थिक वृद्धिलाई सहज बनाउन लक्षित रहेको स्पष्ट पारे।

डा. वाग्लेले खासगरी लगानी, उत्पादन, ऊर्जा, पर्यटन, कृषि, डिजिटल अर्थतन्त्र र अन्य उदीयमान क्षेत्रहरूमा नेपाल-भारत आर्थिक साझेदारीको ठूलो सम्भावना रहेकोमा जोड दिए। 

उनले नेपाल र भारतबीचको दीर्घकालीन आर्थिक सम्बन्धले द्विपक्षीय व्यापार र लगानी विस्तारका लागि बलियो आधार प्रदान गरेको उल्लेख गरे।

अन्तरक्रियामा सहभागी भारतीय व्यवसायिक नेताहरू तथा CII का सदस्यहरूले नेपालमा व्यापार र लगानीका अवसरहरू खोज्न गहिरो रुचि व्यक्त गरे। 

सहभागीहरूले अर्थमन्त्रीसँग सम्भावित सहकार्यका क्षेत्रहरूमा छलफल गर्नुका साथै नेपालको लगानी नीति, सुविधा, क्षेत्रगत अवसरहरू र व्यवसायिक वातावरणका बारेमा थप जानकारी मागेका थिए।

यस अन्तरक्रियाले नेपाल सरकार र भारतीय निजी क्षेत्रबीचको सम्बन्धलाई सुदृढ बनाउन र नेपालमा भारतीय लगानी तथा व्यवसायिक सहकार्य वृद्धिका लागि नयाँ मार्गहरू पहिचान गर्न महत्वपूर्ण मञ्च प्रदान गरेको नेपालको विश्वास छ।

भारत भ्रमणमा रहेका अर्थमन्त्री डा.वाग्लेले नेपाल-भारत आर्थिक सहकार्य, लगानी, कनेक्टिभिटी, ऊर्जा र विपद्पछिको पुनर्निर्माणलाई सुदृढ बनाउने विषयमा भारतीय अधिकारीहरू तथा व्यवसायिक एवं नीतिगत समुदायसँग उच्चस्तरीय छलफल गरिरहेका छन् ।

छलफलमा सीआईआईका पूर्वअध्यक्ष एवं आईटीसी लिमिटेडका अध्यक्ष तथा प्रबन्ध निर्देशक सञ्जीव पुरी; सीआईआई हेल्थकेयर काउन्सिलका अध्यक्ष एवं ग्लोबल हेल्थ लिमिटेड (मेदान्ता) का अध्यक्ष तथा प्रबन्ध निर्देशक डा. नरेश त्रेहान; सीआईआई युरोप काउन्सिलका सह-अध्यक्ष एवं जेबीएम अटो लिमिटेडका उपाध्यक्ष तथा प्रबन्ध निर्देशक निशान्त आर्य; एनएचपीसीका अध्यक्ष तथा प्रबन्ध निर्देशक भूपेन्द्र गुप्ता; वरुण बेभरेजेजका संस्थापक अध्यक्ष रविकान्त जयपुरिया; राइट्स (RITES) का अध्यक्ष तथा प्रबन्ध निर्देशक राहुल मिथल; ज्याक्सन डिस्ट्रीब्युटेड इनर्जीका सीईओ सुधांशु पोखरियाल; जीएमआर इनर्जीका सीओओ मनोजकुमार दीक्षित; डाबर इन्डिया लिमिटेडका कार्यकारी निर्देशक  अभिषेक जुगरान; कोका-कोला इन्डिया र दक्षिण-पश्चिम एसियाकी उपाध्यक्ष देवयानी राणा; र पन्जाब नेसनल बैंकका कार्यकारी निर्देशक एम. परमासिवम सहभागी थिए।