मन्त्री चौधरीद्वारा व्यवसायिक प्राङ्गारिक मल उत्पादकहरूको विवरण संकलन सुरु 

काठमाडौं : कृषि, वन तथा पर्यावरण मन्त्री गिता चौधरीले देशभर रहेका व्यावसायिक प्राङ्गारिक तथा जैविक मल उत्पादकहरूको विवरण संकलन अभियान सुरु गरेकी छिन् ।  

नेपालमा प्राङ्गारिक तथा जैविक मलको व्यावसायिक उत्पादनलाई प्रवर्द्धन गर्ने, उत्पादनको गुणस्तर अभिवृद्धि गर्ने तथा उत्पादकहरूबीच सशक्त सञ्जाल निर्माण गर्ने उद्देश्यले  यो अभियान सञ्चालन भएको हो ।

मन्त्री चौधरीले प्राङ्गारिक मल, भर्मी कम्पोस्ट तथा अन्य जैविक मल व्यावसायिक रूपमा उत्पादन गरिरहेका वा दर्तायुक्त उद्योग वा फर्म सञ्चालन गरिरहेका सबै उत्पादकलाई आफ्नो विवरण अनिवार्य रूपमा दर्ता गराउन आग्रह गरेकी छिन् । 

उत्पादकहरूले QR Code स्क्यान गरेर वा https://forms.gle/SjgsTDRP5abNG45L6  मार्फत आफ्नो विवरण अनलाइन दर्ता गर्न सक्नेछन्। विवरण दर्ता गर्ने अन्तिम दिन साउन २१ गते (बिहीबार) सम्म छ।

मन्त्रालयले सबै व्यावसायिक प्राङ्गारिक तथा जैविक मल उत्पादकलाई समयमै विवरण दर्ता गराई  दिगो कृषि विकास, माटोको उर्वराशक्ति संरक्षण तथा प्राङ्गारिक कृषि प्रवर्द्धनको अभियानमा सहभागी हुन आह्वान गरेको छ।