विकू बचतले सुरु गर्यो ‘ऋण क्लिनिक’, पहिलो दिनमै १६८५ सदस्य लाभान्वित

गैंडाकोट (नवलपरासी) : विकू बचत तथा ऋण सहकारी संस्थाले खुशी एवं स्वस्थ सदस्य निर्माण गर्ने उद्देश्यका साथ शुक्रबारबाट २४ वटै सेवाकेन्द्रमार्फत एकसाथ “ऋण क्लिनिक कार्यक्रम” शुभारम्भ गरेको छ।

आगामी चैत १० गतेसम्म सञ्चालनमा रहने कार्यक्रमको पहिलो दिन नै १ हजार ६८५ जना सदस्य सहभागी भई लाभान्वित भएका छन्।

ऋण क्लिनिकमार्फत सदस्यलाई सहज र सहुलियतपूर्ण ऋण सेवा प्रदान गरिने संस्थाले जनाएको छ। कार्यक्रम अन्तर्गत ४० वर्ष उमेरसम्मका सदस्यले ४० लाख रुपैयाँसम्म कर्जा लिन सक्ने व्यवस्था गरिएको छ । त्यस्तै, नियमित किस्ता भुक्तानी गर्ने सदस्यलाई ब्याज रकममा ५ प्रतिशतसम्म छुट दिइनेछ ।

४० वर्षभन्दा माथिका सदस्यले यस अवधिमा ऋण माग गरेमा ब्याजदरमा ०.५ प्रतिशत छुटको व्यवस्था गरिएको छ भने नाम दर्ता गरी तोकिएको अवधिभित्र ऋण लिने सदस्यलाई पनि ०.५ प्रतिशत ब्याज छुट प्रदान गरिने संस्थाले जनाएको छ ।

ऋणको सिफारिसमार्फत अर्को सदस्यलाई लगानी गराउँदा सिफारिस गर्ने सदस्यलाई ब्याजदरमा ०.२५ प्रतिशत छुटको व्यवस्था संस्थाले गरेको छ।

त्यसैगरी, क्लिनिक अवधिभर पुराना ऋण सदस्यहरूलाई ब्याजदरमा ०.२५ प्रतिशत छुट दिइनेछ । हरित ऋण (विद्युतीय सवारी) मा ७० प्रतिशतसम्म लगानी गरिने र सेवा शुल्क नलाग्ने विशेष व्यवस्था गरिएको संस्थाले जनाएको छ।

संस्थाका अनुसार ‘ऋण क्लिनिक’ बिहान १० बजेदेखि साँझ ५ बजेसम्म सञ्चालन हुनेछ । सदस्यको वित्तीय पहुँच विस्तार, उद्यमशीलता प्रवद्र्धन तथा हरित लगानीलाई प्रोत्साहन गर्ने उद्देश्यले कार्यक्रम ल्याइएको संस्थाका प्रमुख कार्यकारी अधिकृत माधव पौडेलले जानकारी दिए।

ऋण प्रवाह गर्दै संस्थाले सेवा शुल्क नलिने समेत घोषणा गरेको छ।