नेशनल लाइफ इन्स्योरेन्सले कमायो साढे २८ करोड नाफा, बीमा कोषको आकार २५ प्रतिशतले बढ्यो 

काठमाडौं : नेशनल लाइफ इन्स्योरेन्सले लिमिटेडले चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण प्रकाशित गरेको छ । उक्त विवरण अनुसार इन्स्योरेन्सले २८ करोड ६८ लाख ३१ हजार रुपैयाँ खुद नाफा कमाएको छ ।

Sponsored Advertisement

उक्त नाफा गत वर्षको सोही अवधिको तुलनामा २.७६ प्रतिशतले बढी हो । गत आवको सोही अवधिमा कम्पनीले २७ करोड ९१ लाख ४० हजार रुपैयाँ नाफा कमाएको थियो ।

पुस मसान्तसम्म आइपुग्दा कम्पनीको खुद बीमाशुल्क बढेसँगै नाफा बढेको हो । यस अवधिमा कम्पनीले १० अर्ब ७३ करोड रुपैयाँ खुद बीमाशुल्क आर्जन गरेको छ । जुन गत वर्षको तुलनामा १३.१५ प्रतिशतले बढी हो । गत वर्ष इन्स्योरेन्सले नौ अर्ब ४८ करोड ९५ लाख रुपैयाँ खुद बीमाशुल्क आर्जन गरेको थियो ।

यस अवधिमा कम्पनीको लगानी तथा कर्जाबाट हुने आम्दानी १.५४ प्रतिशतले घटेर दुई अर्ब ८७ करोड ८७ लाख रुपैयाँमा झरेको छ । गत वर्षको कम्पनीले लगानी तथा कर्जाबाट दुई अर्ब ९२ करोड ३९ लाख रुपैयाँ आम्दानी गरेको थियो । 

साथै, इन्स्योरेन्सको खुद दाबी भुक्तानी रकम पनि ९.४९ प्रतिशतले बढेर ११ अर्ब ७१ करोड ८२ लाख रुपैयाँ पुगेको छ भने जीवन बीमा कोषको आकार गत आवको तुलनामा २५.१६ प्रतिशतले बढेर ९७ अर्ब ५६ करोड पुगेको छ । 

यस अवधिमा आइपुग्दा इन्स्योरेन्सको कुल आम्दानी १४ अर्ब ३२ करोड रुपैयाँ रहेको छ भने कुल खर्च १३ अर्ब ६३ करोड रुपैयाँ रहेको छ ।

पुस मसान्तसम्म आइपुग्दा नाफा बढेपनि इन्स्योरेन्सको प्रतिशेयर आम्दानी भने घटेको छ। यस अवधिमा इन्स्योरेन्सको इपीएस १०.२८ रुपैयाँ रहेको छ । त्यस्तै कम्पनीको प्रतिशेयर नेटवर्थ १२७.६४ रुपैयाँ रहेको छ भने मूल्य आम्दानी अनुपात ५६.१३ गुणा रहेको छ । 

पुस मसान्तसम्म ५ अर्ब ६९ करोड १६ लाख रुपैयाँ चुक्ता पूँजी रहेको इन्स्योरेन्सको शेयर प्रिमियममा २ करोड ७८ रुपैयाँ, महाविपत्ती कोषमा ७३ करोड ७१ लाख रुपैयाँ, रिटेन्ड अर्निङ्गमा ४० करोड ७९ लाख र अन्य इक्विटीमा ४० करोड रुपैयाँ सञ्चित छ ।