आठ महिनामा थपियो ९२ अर्ब ८३ करोड सार्वजनिक ऋण, करिब २४ खर्ब पुग्यो 

काठमाडौं : नेपालको सार्वजनिक ऋण करिब २४ खर्ब रुपैयाँ पुगेको छ । सार्वजनिक ऋण व्यवस्थापन कार्यालयको तथ्यांक अनुसार फागुन मसान्तसम्म देशको सार्वजनिक ऋण २३ खर्ब ८८ अर्ब २६ करोड रुपैयाँ पुगेको हो ।

गत असार मसान्तसम्म २२ खर्ब ९५ अर्ब ४३ करोड रहेको सार्वजनिक ऋण चालु आवको आठ महिना अर्थात फागुन मसान्तसम्म आइपुग्दा ९२ अर्ब ८३ करोड रुपैयाँ थपिएको हो ।

यस अवधिसम्म सरकारले तिर्न बाँकी आन्तरिक ऋण ११ खर्ब ८५ अर्ब ५२ करोड रुपैयाँ रहेको छ भने बाह्य ऋण १२ खर्ब २ अर्ब ७३ करोड रुपैयाँ रहेको कार्यालयको तथ्यांकमा उल्लेख छ ।

चालु आवको पहिलो आठ महिनामा सरकारले लिएको कुल सार्वजनिक ऋण २ खर्ब १८ अर्ब ८६ करोड रूपैयाँ रहेको छ । जसमा आन्तरिक ऋण एक खर्ब ६३ अर्ब ३१ करोड रुपैयाँ रहेको छ भने बाह्य ऋण ५५ अर्ब ५५ करोड रुपैयाँ रहेको छ ।

फागुन मसान्तसम्म सरकारले आन्तरिक र बाह्य ऋणको साँवावापत एक खर्ब २६ अर्ब तीन करोड रूपैयाँ भुक्तानी पनि गरेको छ । सरकारले आन्तरिक तर्फको एक खर्ब २ अर्ब ९७ करोड र बाह्य तर्फको २३ अर्ब ६ करोड रुपैयाँ बराबरको साँवा भुक्तानी गरेको हो । 

कार्यालयका अनुसार फागुन मसान्तसम्म आन्तरिक ऋणकोे ब्याज भुक्तानीमा ४६ अर्ब ६७ करोड रूपैयाँ खर्च भएको छ भने बाह्य ऋणको ब्याज भुक्तानी गर्न ५ अर्ब ७९ करोड रूपैयाँ खर्च भएको छ ।