चार अर्ब ३९ करोड बैंकहरुमा लगानी गर्दै राष्ट्र बैंक, ब्याजदर प्रस्ताव गर्न आह्वान 

काठमाडौं : नेपाल राष्ट्र बैंकले ४ अर्ब ३९  विभिन्न कोषको रकम बैंकहरुमा लगानी गर्ने भएको छ । बैंकले आइतबार एक सूचना जारी गर्दै विभिन्न कोषको ४ अर्ब ३९ करोड ८०  लाख रुपैयाँ एक वर्षका लागि विभिन्न बैंक तथा वित्तीय संस्थामा मुद्दती निक्षेपमा राख्ने जनाएको हो ।

बैंकले पेन्सन तथा उपदान कोषको तीन अर्ब तीन कराड रुपैयाँ र कर्मचारी सुरक्षण कोषको एक अर्ब ३६ करोड ८० लाख रुपैयाँ मुद्दती निक्षेपका रुपमा लगानी गर्न लागेको हो ।

कोषको उक्त रकम पुस १ गतेदेखि २०८१ पुस ३१ गतेसम्म ३६५ दिनका लागि मुद्दती निक्षेपमा राख्ने जनाएको हो । त्रैमासिक रुपमा भुक्तानी हुने गरी लगानी गर्न लागेको सूचनामा उल्लेख छ ।

बैंकले उपदान तथा पेन्सन कोषमा रहेको रकममध्ये ‘क’ वर्गका वाणिज्य बैंकमा २ अर्ब ४२ करोड ४० लाख , ‘ख’ वर्गका विकास बैंकमा ४५ करोड ४५ लाख रुपैयाँ र ‘ग’ वर्गका राष्ट्रियस्तरका वित्त कम्पनीमा १५ करोड १५ लाख रुपैयाँ मुद्दती निक्षेपमार्फत लगानी गर्न लागेको हो । 

त्यस्तै, बैंकले कर्मचारी सुरक्षण कोषमा रहेको रकममध्ये ‘क’ वर्गका वाणिज्य बैंकहरुमा १ अर्ब ९ करोड ४४ लाख, ‘ख’ वर्गका विकास बैंकहरुमा २० करोड ५२ लाख रुपैयाँ र ‘ग’ वर्गका राष्ट्रियस्तरका वित्त कम्पनीमा ६ करोड ८४ लाख रुपैयाँ मुद्दति निक्षेप मार्फत लगानी गर्न लागेको हो ।

बैंकका अनुसार मुद्दती निक्षेपमा रकम लिन चाहने बैंक तथा वित्तीय संस्थाहरुले तोकिएको न्युनतम पुँजीकोष अनुपात कायम रहेको हुनुपर्नेछ ।

त्यस्तै, निष्क्रिय कर्जा कसल कर्जा सापटीको ५ प्रतिशत भन्दा कम हनुपर्ने, सिडि रेसियो अनुपात बैंकले समय समयमा निर्धारण गरेको सिमा भित्र रहेको हनुपर्नेछ । बैंकले उक्त निक्षेप लिनका लागि सिलबन्दी फारम भरी मंसिर १९ गते बेलुका ७ बजेभित्र आवेदन दिन आग्रह गरेको छ ।