लक्ष्यअनुसारको राजस्व नउठ्दा सरकारी वित्त घाटामा, एक महिनामा करिब २३ अर्ब घट्यो निक्षेप

काठमाडौं : एक महिनामा सरकारी खाताबाट करिब २३ अर्ब रुपैयाँ निक्षेप घटेको छ । राष्ट्र बैंकको अनुसार चालु आर्थिक वर्षको कात्तिक महिनामा सरकारी ढुकुटीमा एक खर्ब २५ अर्ब ४५ करोड ९ लाख रुपैयाँ मौज्दात रहेको छ ।

उक्त मौज्दात गत असोज महिनाको तुलनामा १५.४४ प्रतिशतले घटेको हो । जबकी असोज मसान्तसम्म सरकारी निक्षेप १ खर्ब ४८ अर्ब ३७ करोड ३३ लाख रुपैयाँ रहेको थियो । कात्तिक मसान्तसम्म आइपुग्दा उक्त निक्षेप २२ अर्ब ९२ करोड २४ लाख रुपैयाँले घटेको हो ।

२०८० असार मसान्तसम्म ४५ अर्ब ११ करोड ५७ लाख रुपैयाँ रहेको सरकारी निक्षेप चालु आवको असोज मसान्तसम्म आइपुग्दा १ खर्ब ३ अर्ब २५ करोड ७६ लाख रुपैयाँले बढेको थियो । 

चालु आर्थिक वर्ष २०८०/८१ को पहिलो त्रैमासमा लक्ष्यअनुसार राजस्व संलकन गर्न नसक्दा सरकारको ढुकुटी घाटामा गएको हो । राजस्व असुलीमा सुधार नहुँदा सरकारी वित्त चरम दबाबमा रहेको राष्ट्र बैंकको तथ्यांकले देखाएको छ । 

सरकारी वित्तमा दबाब बढ्दै गएपनि बाह्य क्षेत्रमा भने सुधार हुँदै गएको राष्ट्र बैंकले जनाएको छ । शोधनान्तर स्थिति र विदेशी विनियम सञ्चिति लगातार बढ्दै जाँदा चालु खाता पनि बचतमा रहेको छ । रेमिट्यान्समा भएको उल्लेख्य सुधारले बाह्य क्षेत्र सुधार हुँदै गएको हो ।