स्वास्थ्य बीमामा बढ्दो आकर्षणः झण्डै ४३ अर्बको दाबी भुक्तानी, ७२ लाख पुगे बीमित

काठमाडौं : स्वास्थ्य बीमा बोर्डले हालसम्म स्वास्थ्य बीमा बापतको झण्डै ४३ अर्ब रुपैयाँ दाबी भुक्तानी गरिसकेको छ । बोर्डले स्वास्थ्य बीमा कार्यक्रम शुुरु भएदेखि हालसम्म बीमा वापतको ४२ अर्ब ८३ करोड ६६ लाख ८७ हजार ५९१ रुपैयाँ बराबरको दाबी भुक्तानी गरेको हो ।

चालु आर्थिक वर्षमा मात्रै बोर्डले एक अर्ब बढी दाबी भुक्तानी गरेको छ । बोर्डले यस अवधिमा एक अर्ब ४६ करोड ३८ लाख ५१ हजार रुपैयाँ बराबरको दाबी भुक्तानी गरेको छ । असोज २ गते बसेको बोर्डको निर्णय अनुसार स्वास्थ बीमा कार्यक्रत्रम सञ्चालक गरेका सेवा प्रदायक केन्द्रहरुमा प्रथम पटकको भुक्तानी पठाएको हो ।

बोर्डका अनुसार हालसम्म सात प्रदेशका ३३६ वटा सेवा प्रदायक संस्थाहरुले स्वास्थ्य बीमा कार्यक्रम सञ्चालन गरेका छन् । सेवा प्रदायक स्वास्थ्य संस्थाको दाबी रकममध्ये कटहरिया स्वास्थ्य केन्द्रको पेश्की फर्छोट २ हजार १२६ रुपैयाँ समेत भुक्तानी भएको बोर्डले जनाएको छ ।

स्वास्थ्य बीमा गर्नेहरु करिब ७२ लाख

पछिल्लो समय स्वास्थ्य बीमा गर्नेहरुको संख्या बढेको छ । हालसम्म करिब ७२ लाख भन्दाबढीले स्वास्थ्य बीमा गरेका छन् । स्वास्थ्य बीमा बोर्डका अनुसार यस अवधिमा ७१ लाख ९१ हजार ९६६ जनाले स्वास्थ्य बीमा गरेका हुन् ।

स्वास्थ्य बीमा गर्नेमा सबैभन्दाबढी झापामा रहेका छन् । झापामा यस अवधिमा ६ लाख ७४ हजार ३०५ जनाले बीमा गरेका छन् । त्यस्तै, मोरङमा ५ लाख १२ हजार ३०५, सुनसरीमा ४ लाख ९९ हजार २८ जना र चितवनमा ४ लाख ७२ हजार ८३७ जना रहेका छन् ।

बोर्डका अनुसार प्रदेशगत रुपमा हेर्ने हो भने स्वास्थ्य बीमा गर्नेमा कोशी प्रदेशमा सबैभन्दा बढी रहेका छन् । कोशी प्रदेशमा २१ लाख ८६ हजार ४९ जनाले स्वास्थ्य बीमा गरेका छन् । त्यस्तै, मधेश प्रदेशका ५ लाख २३ हजार ४९९ जनाले स्वास्थ्य बीमा गरेका छन् ।

त्यसैगरी, बागमती प्रदेशमा १५ लाख ३१ हजार १२२ जना, गण्डकीमा ९ लाख २९ हजार ८७८ जना, लुम्बिनी प्रदेशमा १० लाख ५७ हजार ८०२, कर्णालीमा ४ लाख २९ हजार ६५४ जना र सुदुरपश्चिम प्रदेशमा ५ लाख ३३ हजार २६ सयले स्वास्थ्य बीमा गरेका छन् ।