बिमा कम्पनीहरुलाई चुक्ता पुँजी पुर्‍याउन असार मसान्तको समयसीमा

काठमाडौं : नेपाल बीमा प्राधिकरणले बीमा कम्पनीहरुलाई न्यूनतम चुक्ता पुँजी कायम गर्न दिइएको समयसीमा बढाएको छ । प्राधिकरणले ‘बीमक दर्ता तथा बीमा व्यवसाय सञ्चालनसम्बन्धी निर्देशिका, २०७३’ लाई संशोधन गरेर नयाँ निर्देशिका जारी गर्दै चुक्ता पुँजी कायम गर्ने सीमा  तीन महिना थप गरी असार मसान्तसम्म पुर्‍याएको हो ।

यसअघि चैत मसान्तसम्मका लागि तोकिएको उक्त समय सीमालाई प्राधिकरणबाट यही वैशाख ३ गते स्वीकृत भएको ‘बीमक दर्ता तथा बीमा व्यवसाय सञ्चालनसम्बन्धी (दोस्रो संशोधन) निर्देशिका, २०८०’ अनुसार असार मसान्तसम्म पुर्‍याइएको हो ।

“वि.सं. २०७९ चैत मसान्तसम्म चुक्ता पुँजी कायम गर्न नसक्ने बीमकले मनासिब कारणसहित निवेदन दिएमा प्राधिकरणले यस निर्देशिका बमोजिमको चुक्ता पुँजी २०८० असार मसान्तभित्र कायम गर्ने गरी म्याद थप गर्न सक्नेछ”, संशोधित निर्देशिकामा भनिएको छ । प्राधिकरणले जीवन बीमा कम्पनीका लागि रु पाँच अर्ब र निर्जीवन बीमा कम्पनीका लागि रु दुई अर्ब ५० करोड चुक्ता पुँजी कायम गरेको छ ।

हाल सञ्चालनमा रहेका १७ जीवन बीमा कम्पनीमध्ये एउटा र १६ निर्जीवन बीमा कम्पनीमध्ये तीनले मात्रै चुक्ता पुँजी पुर्‍याएको प्राधिकरणले जनाएको छ । यसरी तोकिएको समयमा अधिकांश बीमा कम्पनीको चुक्ता पुँजी नपुगेपछि निर्देशिका संशोधन गरेर तीन महिना समय थप गरिएको हो ।